இந்த தேர்தலில் விஜயகாந்தின் பலம்

இந்த லோக்சபா தேர்தலில் யார் ஜெயிக்க போகிறார்கள் என்பதைப் பற்றிய ஒரு சிறிய அலசல் இது. கிட்டத்தட்ட எல்லா கட்சிகளும் தங்களது வேட்பாளர்களை அறிவித்து விட்டன. இதில் யார் நிறைய தொகுதிகளை வென்று முதலிடம் பிடிக்க போகிறார்கள் என்பது இன்னும் புரியாத புதிராகவே உள்ளது. இதில் இலங்கை பிரச்சினை யார் ஜெயிக்கப் போகிறார்கள் என்பதை தீர்மானிக்கும் ஒரு விஷயமாக இருக்குமா?. திமுகவின் சாதனைகள் இந்த தேர்தலில் அதற்கு முதன்மை பெற்று தருமா?. இப்படி பல கேள்விகள் நமக்குள் இருக்கின்றன.

இருந்தாலும் இந்த தேர்தலில் திமுக ஜெயிக்கும் என்பது என் பலமான கருத்தாக உள்ளது. காரணம் அந்த அரசின் சாதனைகள். ஒரு கிலோ அரிசி ஒரு ரூபாய் என்ற திட்டம் ஏழைகள் மற்றும் நடுத்தர மக்களின் பலமான வரவேற்பை பெற்றுள்ளன. ஏழை விவசாயிகளின் ஏழாயிரம் கோடி ரூபாய் தள்ளுபடி ஒரு நல்ல விஷயம். அதே மாதிரி மத்திய அரசு அறிவித்த 60000 கோடி ரூபாய் தள்ளுபடி இந்த தேர்தலில் பிரதிபலிக்கும் என்பதும் எனது கருத்தாக உள்ளது. இலவச கலர் டிவி திட்டம், ஏழைகளுக்கு இரண்டு ஏக்கர் திட்டம், ஒரு லட்சம் ரூபாய் இன்சூரன்ஸ் திட்டம் என்று பல திட்டங்களை திமுக அரசு செயல்படுத்தியுள்ளது. இவையெல்லாம் இந்த திமுக அரசுக்கு வெற்றியைப் பெற்றுக் கொடுக்கும் என்பது என் யூகம்.

ஆனால் இந்த தேர்தலில் திமுக அரசின் கூட்டணி கொஞ்சல் பலவீனமாகவே உள்ளது. போன தேர்தலில் 40/40 என்று ஜெயித்தவர்கள் இந்த தேர்தலில் கண்டிப்பாக அந்த விகிதத்தில் ஜெயிக்க முடியாது என்பது அனைவரும் அறிந்ததே. அதே மாதிரி அதிமுக இந்த தேர்தலில் பலமான கூட்டணியுடன் களமிறங்குகிறது. அது அதிமுக கட்சிக்கு ஒரு பழம். ஆனால் அதிமுக ஒரு பொறுப்புள்ள எதிர்கட்சியாக செயல்பட்டுள்ளதா என்று பார்த்தால் கண்டிப்பாக இல்லை என்றே சொல்ல தோன்றும். ஆ ஊ என்றால் ஜெயலலிதா சிறுதாவூர் பங்களாவுக்குள் ஓடி மறைந்து கொள்கிறார். பாமகவுக்கு உள்ள மரியாதையை ராமதாசே கெடுத்துக் கொண்டார். வைகோவை பற்றி சொல்ல தேவையில்லை. ஒன்றுக்கும் ரெண்டுக்கும் ஜெயலலிதாவிடம் கையேந்திக் கொண்டிருக்கிறார். அவர் காட்சியில் அவரைத் தவிர வேறு யாரும் இல்லை. நாஞ்சில் சம்பத்தும் சிறையில் இருக்கிறார்.

இதில் கேப்டன் விஜயகாந்த் என்ற ஒருவர் தான் தேறுகிறார். இந்த தேர்தலில் தனியாக களம் காண்பது அவருக்கு மிகுந்த பலத்தைக் கொடுத்துள்ளது. மற்ற கட்சிகளின் வயிற்றில் புளியைக் கரைத்துள்ளது. இளைஞர்களின் ஒட்டு அந்த கட்சிக்கு நிறையவே உள்ளது. நான் கேட்ட நிறைய பேர் விஜயகாந்துக்கு ஒட்டு போடுவார்கள் என்றே சொன்னார்கள். அதை வைத்து பார்க்கும் போது இந்த தேர்தலில் அவர் ஒரு அசைக்க முடியாத சக்தியாக விளங்குவார் என்பது மறுக்க முடியாத உண்மை. இந்த தேர்தலில் கண்டிப்பாக 15 சதவீத ஓட்டுக்களை பெறுவார் என்று நம்புகிறேன். சரி இந்த தேர்தலில் எந்தெந்த கட்சி எத்தனை இடங்களைப் பெறும் என்று இங்கே கொடுத்துள்ளேன்.

திமுக - 23

அதிமுக - 13

தேமுதிக - 4

தேமுதிக இந்த தேர்தலில் நான் மேலே குறிப்பிட்டுள்ள நான்கு தொகுதிகளில் ஜெயித்தால் அவருக்கு அது மிகப்பெரிய வெற்றியாக இருக்கும். இது லோக்சபா தேர்தல் என்றாலும் மாநில அரசின் சாதனைகள் திடமாக பிரதிபலிக்கும்.
சரி இலங்கைப் பிரச்சினைப் பற்றி பேசவே இல்லையே என்று கேட்கிறீர்களா?. ஆனால் அந்த பிரச்சினை இந்த தேர்தலில் ஒரு தீர்மானிக்கும் சக்தியாக இருக்காது. பெரும்பாலான மக்கள் அதை ஒரு தேர்தல் பிரச்சினையாக நினைக்கவில்லை.

உங்கள் ஒட்டு கேப்டன் விஜயகாந்திற்கு!

நான் ஏற்கனவே சொன்னது போல விஜயகாந்த் இந்த தேர்தலில் தனித்தே களம் காண்கிறார். அவருக்கு என்னுடைய வாழ்த்துக்கள். வேறு யாராவது இந்த தேர்தலில் தனித்து நிற்கிறார்களா?. இல்லை. ஏன்?. ஏனென்றால் அவர்களுக்கு பயம். தனியாக நின்றால் தோற்றுவிடுவோமோ என்ற பயம். இத்தனை வருடங்கள் திமுகவும் அதிமுகவும் தமிழ்நாட்டை மாறி மாறி ஆட்சி செய்தார்களே, இன்னும் ஏன் அவர்களுக்கு தனியாக நிற்க தைரியம் வரவில்லை. அவர்களுக்கே தெரியும் அவர்கள் மக்களாட்சி செய்யவில்லை என்று.

கருணாநிதி மக்களாட்சி என்பதை தன் மக்களுக்கு (குடும்பம்) செய்ய வேண்டிய ஆட்சி என்று நினைத்து விட்டார். அதனால் தான் இன்று பல கோடிகளுக்கு அதிபராகி விட்டார். முதல்வன் படத்தில் வருவது போல கருணாநிதி அரசியலில் நுழையும் பொது எவ்வளவு ரூபாய் வைத்து இருந்திருப்பார். மிஞ்சிப்போனால் ஒரு லட்சம் ரூபாய் வைத்து இருந்திருப்பாரா? (இதுவே அதிகம் என்று நினைக்கிறேன்.). ஆனால் இன்று எத்தனை கோடிகள் வைத்திருப்பார். ஒரு பத்தாயிரம் கோடிகள். இல்லை மேலும் இருக்கும் என்று உறுதியாக நம்புகிறேன். கருணாநிதி எவ்வளவு பணம் வைத்திருப்பார் என்று அவருக்கே தெரியாது. ஏனென்றால் தினமும் அவர் கஜானாவில் கோடிக்கணக்கில் பணம் ஏறிக்கொண்டேயிருக்கும். எல்லாம் மக்களின் வரிப்பணம். அரசாங்கமே அவர் கையில் இருக்கிறதல்லவா. அரசாங்கத்தை அவர் கையில் கொடுத்தது மக்கள் தானே. அதற்கான பலன் தான் இது. நியூட்டனின் மூன்றாம் விதி என்ன சொல்கிறது?. ஒவ்வொரு செயலுக்கும் ஒரு எதிர்ச்செயல் உண்டு. (For every action, there is an equal and opposite reaction) அதைத்தான் இன்று தமிழக மக்கள் அனுபவித்து கொண்டிருக்கிறார்கள்.

அடுத்தது ஜெயலலிதா (இவரை அம்மா என்று அதிமுகவினர் அன்போடு அழைப்பார்களாம்.என்ன கொடுமை சரவணன் இது). யாரை அம்மா என்று சொல்ல வேண்டும் என்று தமிழக அரசியல்வாதிகளுக்கு ஒரு நாள் தனியாக பாடம் எடுக்க வேண்டும். அவர் மேல் எத்தனை ஊழல் வழக்குகள். என்னால் என்ன முடியவில்லை. ஆனால் எனக்கு ஜெயலலிதாவிடம் பிடித்தது அவரது தைரியம். ஆணாதிக்கம் மிக்க அரசியலில் தன்னாலும் கொள்ளையடிக்க முடியும் என்று நிரூபித்து காட்டியிருக்கிறார். எவ்வளவு வழக்குகள் போட்டாலும் நான் பயப்பட மாட்டேன், நான் கொள்ளையடித்து கொண்டே இருப்பேன் என்ற அந்த தைரியம் தான் எனக்கு அவரிடம் மிகவும் பிடித்தது.


அடுத்தது நம் ராமதாஸ் (இவரை கொய்யா ஸாரி அய்யா என்று கூப்பிடுவார்கள்). நம் விஜயகாந்த் சொன்னது மாதிரி இவர் ஐந்து வருடம் வேஷ்டியைத் துவைப்பார். இன்னொரு ஐந்து வருடம் சேலையைத் துவைப்பார். போன ஜென்மத்தில் டோபியாக (மற்றவர்களின் துணிகளைத் துவைப்பவர்கள்) பிறந்திருப்பார் என்று நினைக்கிறேன். (டோபிகளை தவறாக நினைக்கிறேன் என்று யாரும் என்னை நினைக்க வேண்டாம். அவர்களின் மேல் எனக்கு மிகுந்த அன்பு உள்ளது). இவர் கடைசி நிமிடம் வரைக்கும் காங்கிரஸில் இருந்து விட்டு (மகன் அன்புமணியின் பதவிக்காக மற்றும் மக்கள் டிவியின் அரசாங்க விளம்பிரத்திற்கு) பதவிக்காலம் முடிய இரண்டு மாதம் மட்டுமே உள்ள நிலையில் அதிமுகவிடம் பணம் வாங்கிக் கொண்டு சகோதரி (ஐந்து வருடத்திற்கு ஒருமுறை தத்து எடுத்து விடுகிறார்) ஜெயலலிதாவின் சேலையைத் துவைக்க கிளம்பி விட்டார். இவருக்கு இதெல்லாம் ஒரு பொழப்பு. இதுக்கு பேசாம ....... கட்.கட்..வேண்டாம்... அதற்கு மேல் என் வாயில் நல்ல வார்த்தைகள் இல்லை.


அடுத்தது கேப்டன். விஜயகாந்தை விஜயகாந்த் என்று சொல்வதை விட அவரை கேப்டன் என்று சொல்வதே எனக்கு பெருமையாக இருக்கிறது. அவருக்கு அந்த பெயர் மிக பொருத்தமாக இருக்கிறது. உங்களுக்கும் அப்படித்தான் என்று நினைக்கிறேன். அவர் நடிகனாக ஆரம்பித்து, அவர் பின்னாடி இன்று இவ்வளவு லட்சக்கணக்கான ரசிகர்கள் சேர்ந்தது வரை அவருடைய உழைப்பு எவ்வளவு இருந்திருக்கும். அவர் இருக்கும் உருவத்திற்கு அவர் நடிகனாக நுழைந்ததே பெரிய விஷயம். இன்று வரை நீடித்து நிற்பது அதை விட பெரிய விஷயம். லட்சக்கணக்கான ரசிகர்களை இவ்வளவு கட்டுக்கோப்புடன் வைத்திருக்கும் அவரை கேப்டன் என்று சொல்வதில் தவறில்லை என்றே நினைக்கிறேன்.

நின்ற முதல் சட்டசபைத் தேர்தலில் விருத்தாசலம் தொகுதியில் பதினைந்தாயிரம் ஓட்டுகள் வித்தியாசத்தில் ஜெயித்தார். எப்படி?. மக்கள் அவர் மேல் நம்பிக்கை வைத்தார்கள். அவர் மக்கள் மீது நம்பிக்கை வைத்தார். அதனால் தான் இன்று வரை தனித்தே நிற்கிறார். அவர் நினைத்திருந்தால் பல கோடிகளைப் பெட்டியில் வாங்கிக் கொண்டு போயிருக்க முடியும். ஆனால் அப்படி செய்யவில்லை. மக்களுக்கு ஏதாவது நல்லது செய்ய வேண்டும் என்று நினைத்தார். இவ்வளவு காலம் திமுகவுக்கும் அதிமுகவுக்கும் மாறி மாறி ஒட்டு போட்டோம். ஒரு மயிரும் நடக்கவில்லை. ஒரு தடவை கேப்டன் விஜயகாந்திற்கு போடுவோம். என்ன செய்கிறார் என்று பார்ப்போம்.


பின்குறிப்பு:

யார் மனதாவது புண்படும்படி எழுதியிருந்தால் என்னை மன்னிக்கவும் (ஹி.ஹி. ஹி.).

விஜயகாந்த் செய்ய வேண்டியது!

விஜயகாந்த் தேமுதிக என்ற கட்சியை புதிதாக ஆரம்பித்த போது, அதை ஆதரித்தவர்களில் நானும் ஒருவன். முதலில் மக்களுடன் மட்டுமே கூட்டணி என்றார். கட்சி ஆரம்பித்த முதல் சட்டசபைத் தேர்தலில் எட்டு சதவீதத்திற்கும் மேல் ஓட்டுகளைப் பெற்று மற்ற கட்சிகளை வாயடைக்க வைத்தார். விருத்தாசலம் தொகுதியில் பாமகவை எதிர்த்து தானே போட்டியிட்டு அமோக வெற்றி பெற்றார். பிறகு வந்த இடைத்தேர்தலிலும் உள்ளாட்சித் தேர்தலிலும் நிறைய வாக்குகள் பெற்றார். ஆனால் வெற்றி பெற முடியவில்லை.

வெற்றி பெற முடியவில்லை என்று தெரிந்ததும் அவர் என்ன செய்தார். தமிழ் நாட்டு மக்களுக்கு நல்லது செய்வோம் என்று எழுதிக் கொடுக்கும் கட்சிகளுடன் மட்டுமே கூட்டணி என்று அறிவித்தார். பிறகு சென்னை மற்றும் பிற இடங்களில் நடந்த பொதுக் கூட்டங்களில் மக்களுடன் மட்டுமே கூட்டணி என்றார். சமீபத்தில் மதுரையில் நடந்த இடைத்தேர்தலில் அவரது தேமுதிக கட்சி தோல்வி அடைந்தது. கடந்த முறை அதே தொகுதியில் நடந்த தேர்தலில் வாங்கிய வாக்குகளைக் காட்டியும் குறைவான வாக்குகளைப் பெற்றார். அதற்கு முக்கிய காரணம் திமுக மற்றும் அதிமுக ஆகிய கட்சியின் பணபலம். ஒரு ஓட்டுக்கு ஆயிரம் இரண்டாயிரம் என்று மக்கள் பணத்தை மக்களிடமே வாரி இறைத்தார்கள். மக்களும் அந்த கட்சிகளுக்கு ஒட்டு போட்டார்கள்.

இந்தியாவில் இன்னும் ஏழ்மை நிலை அதிகமாகத்தான் இருக்கிறது. அதை அரசியல்வாதிகள் மாற்ற மாட்டார்கள். காரணம் ஒட்டு வங்கி. தமிழகத்திலும் அதுதான் நடக்கிறது. கடந்த நாற்பது ஆண்டுகளுக்கும் மேலாக இரு திராவிட கட்சிகளும் தமிழகத்தை மாறி மாறி ஆண்டு வருகின்றது. அவர்கள் நினைத்திருந்தால் தமிழகத்தை அனைத்து துறைகளிலும் முன்னணியில் கொண்டு வந்திருக்கலாம். விவசாயத்தில் புரட்சியை ஏற்படுத்தியிருக்கலாம். ஆனால் என்ன நடந்தது. அதுதான் இன்று பார்க்கிறோமே. விவசாயிகள் அவர்கள் விளைவித்த பயிர்களுக்கு அவர்களே விலையை நிர்ணயம் செய்ய முடியாமலும், அரசும் அந்த பயிர்களுக்கு உரிய விலையை கொடுக்காமலும் விவசாயிகளை ஒட்டு மொத்தமாக நசுக்குகின்றனர். வாழ முடியாமல் கடன் வாங்கி அதைக் கட்ட முடியாமல் தற்கொலை செய்து கொண்ட அவலமும் இங்கு நடந்தது.

ஏழ்மை என்னும் நிலைமையை தங்களுக்கு சாதகமாக்கி இரு திராவிட கட்சிகளும் மாறி மாறி தமிழகத்தை அழித்து வந்திருக்கின்றன. இந்த நிலையில் தான் இரு திராவிட காட்சிகளுக்கு மாற்றாக தேமுதிகவை ஆரம்பித்தார். சரி இவர் ஏதாவது செய்வார் என்ற நம்பிக்கை ஏழை மக்களுக்கு பிறந்தது. முதலில் மக்களுடன் கூட்டணி என்றவர் பிறகு தேசிய கட்சிகளுடன் கூட்டணி என்றார். இப்போது வரப்போகும் லோக்சபா தேர்தலில் அவர் யாருடன் கூட்டணி வைக்க போகிறார் என்று இன்னும் தெரியவில்லை. பத்திரிகைகள் அவர்கள் இஷ்டத்திற்கு கதைகளைக் கட்டி விடுகின்றனர். அதற்கு விஜயகாந்தும் மறுப்பு தெரிவிக்காமல் இருந்து வருகிறார்.

தான் தனித்து போட்டியிட்டால் எப்படியும் ஜெயிக்க மாட்டோம் என்று அவருக்குத் தெரியும். அதனால் லோக்சபா தேர்தலில் யாருடன் கூட்டணி என்று விரைவில் அறிவிப்பேன் என்று சொல்கிறார். ஏன் அவர் முதலில் சொன்ன மாதிரி தனித்தே போட்டியிடலாமே. தோற்றால் தோற்க்கட்டுமே. அவர் கட்சி ஆரம்பித்து எத்தனை வருடங்கள் ஆகின்றது. எத்தனை சட்டசபைத் தேர்தல்களை சந்தித்திருக்கிறார். எத்தனை லோக்சபா தேர்தல்களை சந்தித்திருக்கிறார். அதற்குள் முதல்வர் ஆவேன் என்றால் எப்படி?. அமெரிக்க அதிபராக இருந்த ஆபிரஹாம் லிங்கன் எப்படி அதிபரானார். தொடர்ந்து ஐம்பத்து இரண்டு முறை தேர்தல்களிலே தோற்றவர் அவர். பிறகுதான் வெற்றி பெற்றார்.

விஜயகாந்த் மட்டும் உடனே முதல்வர் ஆக வேண்டும் என்றால் எப்படி?. பொறுத்திருக்க வேண்டும். இன்னும் கொஞ்ச காலம் பொறுத்திருக்க வேண்டும். தெளிவான முடிவுகளை அவர் எடுக்க வேண்டும். அதனை மக்களுக்கு அவர் தெளிவாக உணர்த்த வேண்டும் முதலில் ஒன்றை கூறி விட்டு பிறகு வேறொன்றை அவர் செய்யக்கூடாது. அது அவருக்கு அழகல்ல. இதனை விஜயகாந்த் உணர வேண்டும். உடனே அவர் ஒரு முடிவு எடுத்தாக வேண்டும். வரும் லோக்சபா தேர்தலில் தனித்து போட்டியா அல்லது கூட்டணியா என்று அவர் உடனே அறிவிக்க வேண்டும். ஆனால் அவர் தனித்தே நிற்க வேண்டும் என்பதுதான் பெரும்பாலான மக்களின் விருப்பமாக இருக்கிறது. எனது விருப்பமும் அதுவே. பார்ப்போம் அவர் தனித்து நிற்கிறாரா அல்லது கூட்டணி வைக்கிறாரா என்று.