Sunday, March 22, 2009

ஈழமும் இந்தியாவின் நிலைப்பாடும்!



கடந்த 30 ஆண்டுகளுக்கும் மேலாக ஈழத்தமிழர்களின் பிரச்சனை நீண்டு கொண்டே போகிறது. இதற்கு முடிவே இல்லையா? ஈழத்தமிழர்களுக்கு இது ஒரு சாபமா?.அவர்களுடைய வாழ்வில் மறுமலர்ச்சி ஏற்பட போவதில்லையா?. இப்படி தினமும் பல கேள்விகள் என்னை நானே கேட்டுக் கொள்கிறேன். நம்மால் அவர்களுக்கு என்ன செய்ய முடியும்? தமிழகத்தில் இருக்கும் ஈழ அகதிகளுக்கு நம்மால் ஆன உதவிகள் செய்யலாம்?. வேறென்ன நம்மால் செய்ய முடியும்?. இந்த அகதி என்ற சொல்லை நாம் பயன்பாட்டிலிருந்து நீக்க வேண்டும். அந்த சொல்லை சொன்னாலே மனதில் ஒருவித தாங்க முடியாத வலி ஏற்படுகிறது. அது உணர்ச்சி உள்ள மனிதர்களுக்கு புரியும். இந்த ஈழத்தமிழர்களின் பிரச்சனை எப்போதோ முடிவுக்கு வந்திருக்க வேண்டிய விஷயம். இந்தியா நினைத்திருந்தால்.

ஆனால் இந்தியாவின் நிலைப்பாடு உணர்ச்சியுள்ள மனிதனின் மனதில் ஒருவித தவறான தாக்கத்தை ஏற்படுத்துகிறது. சமீபத்தில் ஒரு பேட்டியில் இலங்கை ராணுவ தளபதி "இந்தியா உதவாமல் இருந்திருந்தால் நாங்கள் இந்த அளவுக்கு புலிகளை வென்றிருக்க முடியாது" என்கிறார். இந்தியா சுதந்திரம் வாங்கி 60 ஆண்டுகளாகிவிட்டது. இந்த 60 ஆண்டுகளில் நாம் பல போர்களை சந்தித்துவிட்டோம். பாகிஸ்தானுடன் நான்கு போர்களையும் (1947, 1965, 1971, 1999) சீனாவுடன் ஒரு போரையும் (1962) சந்தித்து விட்டோம். ஆனால் இந்த போர்களிலெல்லாம் இலங்கை அரசின் நிலைப்பாடு எப்படி இருந்தது. இந்தியாவுக்கு எதிராகவே இருந்து வந்துள்ளது. நிலைமை இப்படி இருந்தும் இந்தியா ஏன் இலங்கைக்கு ராணுவ உதவிகள் அளிக்கிறது?. அதற்கும் சில அரசியல் காரணங்கள் (ராஜதந்திரம் என்று சொல்வார்கள்) இருக்கிறது. அதனை கீழே பார்ப்போம்.

இந்தியாவுக்கு இருபக்கமும் ராணுவ எதிரிகள் (சீனா, பாகிஸ்தான்) இருக்கிறார்கள். இந்தியாவை எப்போது அழிக்கலாம் என்று காத்து கொண்டிருக்கிறார்கள். நமக்கு கீழே இலங்கை இருக்கிறது. அவர்களுக்கு எதிராக நாம் செயல்பட்டால் பிறகு அவர்களும் (இலங்கை) நமக்கு எதிரியாகிவிடுவர். அப்புறம் கேட்க தேவையில்லை. இந்தியாவைச் சுற்றி எதிரிகள் என்ற நிலைமை வந்துவிடும். இப்போதே சீனா இலங்கையுடன் பாசத்துடன் நடந்து கொள்கிறது. பிறகு ஏதாவது ஆபத்து காலத்தில் (போர் வந்தால்) இலங்கை சீனாவுக்கு ஆதரவாக செயல்படும். பாகிஸ்தானைப் பற்றி கேட்கத் தேவையில்லை. எப்போது இந்தியாவை போட்டு தள்ளலாம் என்று காத்துக் கொண்டிருக்கிறார்கள். அது நமுக்கு பெரும் இடியாக வந்து விடும். நம்மால் ஒன்றுமே செய்ய முடியாத நிலைமை வந்துவிடும். ஆனால் இலங்கையின் நிலைப்பாடு எப்போதும் சீனாவுக்கும் பாகிஸ்தானுக்கும் ஆதரவாகவே இருந்து வந்துள்ளதும். இனியும் அப்படித்தான் இருக்கும் என்பதில் சந்தேகமில்லை. அதனால் தான் இந்தியா அமெரிக்காவுடன் நெருங்கிப் பழகுகிறது. நம் எதிரிகளுடன் போர் வந்தால் அமெரிக்கா நமக்கு சாதகமாக இருக்க வேண்டும் என்பதால். இது வரவேற்க படவேண்டிய விஷயம் தான். ஆனால் அமெரிக்க அரசின் நம்பத்தன்மை எந்த அளவு இருக்கும் என்பதை இந்தியா இன்னும் தெளிவாக புரிந்து கொள்ள முற்சிக்க வேண்டும். அது இந்தியாவுக்கு நல்லது. நாம் மற்றவர்களை நம்பி பிழைக்க வேண்டிய நிலைமை இருக்க கூடாது. அதற்கான முயற்சிகளை இந்தியா எடுக்க வேண்டும்.

சரி விஷயத்திற்கு வருவோம். இந்தியா இலங்கைக்கு எவ்வளவோ ராணுவ உதவிகள் அளித்தும் இலங்கை அரசு நமக்கு எதிராகவே செயல்பட்டு கொண்டிருக்கிறது. ஆனால் விடுதலை புலிகள் அப்படியல்ல. அவர்கள் எப்போதுமே இந்தியாவுடன் நல்ல உறவு வைத்துக் கொள்ள விரும்புபவர்கள். இலங்கை மாதிரி சந்தர்ப்பவாதிகள் அல்ல. இந்தியாவின் ஆதரவை எதிர்பார்ப்பவர்கள். ஆனால் மற்ற நாடுகள் விடுதலைப் புலிகளுக்கு ஆதரவாக (ஈழத்தமிழர்கள்) அறிக்கைகள் விட்டுக் கொண்டிருக்கும் வேளையில் இந்தியா அவர்களுக்கு எதிராக செயல்படுகிறது. அதனை விட்டுவிட்டு இந்தியா ஈழத்தமிழர்களின் நலனுக்கு ஆதரவாக செயல்படலாம். விடுதலை புலிகளுக்கும் இலங்கைக்கும் மீண்டும் பேச்சு வார்த்தை தொடங்கி வைக்க இந்தியாவால் முடியும். முதலில் விடுதலை புலிகளை தீவிரவாத இயக்கத்திலிருந்து நீக்கி அவர்களைப் போராளிகளாக அங்கீகரிக்க வேண்டும். அது அவர்களுக்கு நாம் செய்யும் பெரும் உதவியாக இருக்கும். தமிழர்கள் இலங்கையில் நிம்மதியாக வாழவேண்டும். ஒவ்வொரு தமிழனின் விருப்பமும் இதுதான். இதில் மாற்று கருத்து இல்லை. அப்படி மாற்று கருத்து இருந்தால் அவன் தமிழன் இல்லை. ஈழத் தமிழர்களுக்கு என்று ஒரு நாடு உருவானால் அவர்கள் எந்த நமக்கு ஆதரவாகவே இருப்பார்கள். ஏனென்றால் அவர்கள் நம் ரத்தங்கள். நம் சகோதரர்கள். அவர்கள் அங்கே தினமும் மடிந்து கொண்டு இருக்கும் வேளையில் இங்கே நாம் நிம்மதியாக இருப்பது இவர்களின் சாவை நாம் ரசிப்பது போலாகிவிடும். அது நமக்கு தீராசாபம். அது நம்மை சும்மாவிடாது.

பின்குறிப்பு:

ஒன்றே ஒன்று சொல்லிக் கொள்ள ஆசைப்படுகிறேன். எந்த காலத்திலும் இலங்கை விடுதலைப் புலிகளை அழிக்க முடியாது. ரஜினிகாந்த் சொன்னது போல கடந்த முப்பது வருடங்களாக போர் நடந்து வருகிறது. இதுவரைக்கும் ஒன்றும் பிடுங்க முடியாதவர்கள் இனியும் ஒன்றும் பிடுங்க முடியாது. ஈழம் அமைந்தே தீரும். இது உறுதி.

Friday, March 20, 2009

காதலித்துப்பார்!


உன்னைச் சுற்றி
ஒளிவட்டம் தோன்றும்

உலகம் அர்த்தப்படும்

ராத்திரியின் நீளம்
விளங்கும்

உனக்கும்
கவிதை வரும்

கையெழுத்து
அழகாகும்

தபால்காரன்
தெய்வமாவான்

உன் பிம்பம் விழுந்தே
கண்ணாடி உடையும்

கண்ணிரண்டும்
ஒளிகொள்ளும்


காதலித்துப் பார்
------------------------------

தலையணை நனைப்பாய்
மூன்றுமுறை பல்துலக்குவாய்

காத்திருந்தால்
நிமிஷங்கள் வருஷமென்பாய்

வந்துவிட்டால்
வருஷங்கள் நிமிஷமென்பாய்

காக்கைக்கூட உன்னை
கவனிக்காது
ஆனால் - இந்த உலகமே
உன்னையே கவனிப்பதாய்
உணர்வாய்

வயிற்றுக்கும் தொண்டைக்குமாய்
உருவமில்லா உருண்டையொன்று
உருளக் காண்பாய்

இந்த வானம் இந்த அந்தி
இந்த பூமி இந்த பூக்கள்
எல்லாம்
காதலை கௌரவிக்கும்
ஏற்பாடுகள் என்பாய்


காதலித்துப்பார்
--------------------------------

இருதயம் அடிக்கடி
இடம்மாறித் துடிக்கும்

நிசப்த அலைவரிசைகளில்
உனது குரல் மட்டும்
ஒலிபரப்பாகும்

உன் நரம்பே நாணேற்றி
உனக்குள்ளே அம்புவிடும்

காதலின் திரைச்சீலையைக்
காமம் கிழிக்கும்

ஹார்மோன்கள்
நைல்நதியாய்ப் பெருக்கெடுக்கும்
உதடுகள் மட்டும்
சகாராவாகும்

தாகங்கள் சமுத்திரமாகும்
பிறகு
கண்ணீர்த் துளிக்குள்
சமுத்திரம் அடங்கும்

காதலித்துப்பார்
-----------------------------------

பூக்களில் மோதி மோதியே
உடைந்து போக
உன்னால் முடியுமா?

அகிம்சையின் இம்சையை
அடைந்ததுண்டா

அழுகின்ற சுகம்
அறிந்ததுண்டா?
உன்னையே உனக்குள்ளே
புதைக்கத் தெரியுமா?

சபையில் தனிமையாகவும்
தனிமையை சபையாக்கவும்
உன்னால் ஒண்ணுமா?

அத்வைதம்
அடைய வேண்டுமா?

ஐந்தங்குல இடைவெளியில்
அமிர்தம் இருந்தும்
பட்டினி கிடந்து பழகியதுண்டா?

காதலித்துப்பார்
---------------------------------------

சின்னச்சின்னப் பரிசுகளில்
சிலிர்க்க முடியுமே

அதற்காகவேனும்

புலன்களை வருத்திப்
புதுப்பிக்க முடியுமே

அதற்காகவேனும்

ஆண் என்ற சொல்லுக்கும்
பெண் என்ற சொல்லுக்கும்
அகராதியில் ஏறாத
அர்த்தங்கள் விளங்குமே

அதற்காகவேனும்

வாழ்ந்துகொண்டே
சாகவும் முடியுமே
செத்துக்கொண்டே
வாழவும் முடியுமே

அதற்காகவேனும்

காதலித்துப்பார்
------------------------------------

சம்பிரதாயம்
சட்டை பிடித்தாலும்
உறவுகள்
உயிர்பிழிந்தாலும்

விழித்துப் பார்க்கையில்
உன் தெருக்கள்
களவு போயிருந்தாலும்

ஒரே ஆணியில் இருவரும்
சிக்கனச் சிலுவையில்
அறையப்பட்டாலும்

நீ நேசிக்கும்
அவனோ அவளோ
உன்னை நேசிக்க மறந்தாலும்

காதலித்துப்பார்

சொர்க்கம் - நரகம்
இரண்டில் ஒன்று
இங்கேயே நிச்சயம்

காதலித்துப்பார்

கவிஞர் - கவிப்பேரரசு வைரமுத்து
நூல் - இந்தப் பூக்கள் விற்பனைக்கல்ல

Wednesday, March 18, 2009

அவன்தான் மனிதன் பாடல்கள்


ஆட்டுவித்தால்
யாரொருவர் ஆடாதாரே கண்ணா
ஆசையெனும் தொட்டிலிலே ஆடாதாரே கண்ணா
நீ நடத்தும் நாடகத்தில் நானும் உண்டு
என் நிழலில் கூட அனுபவத்தில் சோகம் உண்டு
பகைவர்களை நானும் வெல்வேன் அறிவினாலே-ஆனால்
நண்பனிடம் தோற்றுவிட்டேன் பாசத்தாலே
நண்பனிடம் தோற்றுவிட்டேன் பாசத்தாலே -(ஆட்டுவித்தால்)

பாஞ்சாலி உன்னிடத்தில் சேலை கேட்டாள்-அந்த
பார்த்தனவன் உன்னிடத்தில் கீதை கேட்டான்
நானிருக்கும் நிலையில் உன்னை என்ன கேட்பேன்-இன்னும்
நன்மை செய்து துன்பம் வாங்கும் உள்ளம் கேட்பேன்
நன்மை செய்து துன்பம் வாங்கும் உள்ளம் கேட்பேன் -(ஆட்டுவித்தால்)

கடலளவு கிடைத்தாலும் மயங்க மாட்டேன்-அது
கையளவே ஆனாலும் கலங்க மாட்டேன்
உள்ளத்திலே உள்ளதுதான் உலகம் கண்ணா-இதை
உணர்ந்து கொண்டேன் துன்பமெல்லாம் விலகும் கண்ணா
உணர்ந்து கொண்டேன் துன்பமெல்லாம் விலகும் கண்ணா -(ஆட்டுவித்தால்)
----------------------------------------------*------------------------------------------------

மனிதன் நினைப்பதுண்டு வாழ்வு நிலைக்குமென்று
இறைவன் நினைப்பதுண்டு பாவம் மனிதனென்று (மனிதன்)

தந்தை தவறு செய்தார் தாயும் இடம் கொடுத்தார் (2)
வந்து பிறந்து விட்டோம் வெறும் பந்தம் வளர்த்து விட்டோம்
மனது துடிக்கின்றது மயக்கம் வருகின்றது
அழுது லாபமென்ன அவன் ஆட்சி நடக்கின்றது (மனிதன்)

காட்டு மனமிருந்தால் கவலை வளர்ந்துவிடும் (2)
கூட்டை திறந்துவிட்டால் அந்த குருவி பறந்துவிடும்
காலில் விலங்கு இட்டோம் கடமை என அழைத்தோம்
நாலு விளங்குகையில் தினம் நாட்டியம் ஆடுகின்றோம் (மனிதன்)

விதியின் ரதங்களிலே நாம் விரைந்து பயணம் செய்தால்
மதியும் மயங்குதடா சிறு மனமும் கலங்குதடா
கொடுக்க எதுவுமில்லை குழப்பம் முடிந்ததடா
கணக்கை முடித்துவிட்டேன் ஒரு கவலை முடிந்ததடா (மனிதன்)

Tuesday, March 17, 2009

காஞ்சீவரம் - திரைப்பார்வை






















ஆஹா! இந்த மாதிரி உலகத் தனமான சினிமாவைப் பார்த்து எத்தனை நாளாச்சு?. கமர்ஷியல் வாசனையே இல்லாத சினிமாவைப் பார்த்து எத்தனை நாளாச்சு?. எனக்குத் தெரிந்து இந்த மாதிரி தமிழ் சினிமாவை நான் இதுவரை பார்த்து கிடையாது. காஞ்சீவரம் பலருக்கு பிடிக்காமல் போகலாம். ஆனால் சிலருக்கு பிடிக்கும். அந்த சிலர்தான் உண்மையிலேயே உண்மையான சினிமா ரசிகன். சரி கதைக்கு வருவோம்.

வேங்கடம் நம்முடைய கதையின் நாயகன் ஒரு நெசவுத் தொழிலாளி. திருட்டு வழக்கில் கைதாகி இரண்டு நாட்கள் பரோலில் உடல் நலம் குன்றி இருக்கும் தன் மகளைப் பார்க்க போலீசாருடன் பஸ்ஸில் வீடு வருகிறார். பெரும் மழை பெய்கிறது. அதனூடே வேங்கடத்தின் கடந்த கால வாழ்கையும் நம்முன்னே விரிகிறது.

தனக்கு கல்யாணம் செய்யும் பொது தன் மனைவிக்கு பட்டு புடவை உடுத்திதான் அவளுக்குத் தாலி கட்டுவேன் என்று சபதம் செய்து அது முடியாமல் போக, வெறும் கூரைப்பட்டு சேலை உடுத்தி ஊருக்கு வரும் வேங்கடத்தைப் பார்த்து ஊர் கண்டவிதமாய்ப் பேசுகிறது. பிறகு தனக்கு பிறக்கும் குழந்தைக்கு அவள் கல்யாணம் செய்து போகும் போது பட்டுச் சேலை உடுத்தி அனுப்புவதாக ஊர் முன்னிலையில் சொல்கிறார். ஊர் அவரைப் பார்த்து சிரிக்கிறது. அவரது மனைவிக்கும் அவரது மேல் கோபம். ஊர் அவரைப் பார்த்து சிரித்ததைப் பற்றி அவருக்கு கவலையில்லை. தன் மனைவி தன் மேல் நம்பிக்கை இல்லாமல் இருக்கிறாளே என்று வருத்தம். தன் மனைவியைக் கூப்பிட்டு உண்டியலில் தான் சேமித்து வைத்திருக்கும் பணத்தைக் காட்டுகிறார். அதில் பட்டுச் சேலை வாங்குவதற்கு பாதி பணம் இருப்பதாகவும், மீதி பணத்தைத் தன் குழந்தையின் திருமணத்திற்குள் சேமித்து விட முடியும் என்று சொல்கிறார். அவரது மனைவிக்கு நம்பிக்கை பிறக்கிறது.












ஆனால்
மறுநாளே வேங்கடத்தின் தங்கையின் கணவர் பணம் கேட்டு நச்சரிக்க தான் சேமித்து வைத்திருந்த பணத்தை அவருக்குக் கொடுக்கிறார். அவரது மனைவிக்கு அதில் வருத்தம். தன் குழந்தையின் திருமணத்திற்கு சேமித்த வைத்த பணம் போய்விட்டதே என்ற சோகத்தில் தான் வேலை செய்யும் இடத்தில் இருந்து தினமும் பட்டு நூலைத் தன் வாயில் அடைத்து வைத்துத் திருடிகிறார். திருடி வரும் நூலை வைத்து தன் வீட்டில் இருக்கும் தறியில் பட்டு சேலையை கொஞ்சம் கொஞ்சமாக நெய்கிறார்.

இடையில் அவரது மனைவி உடல் நலம் சரியில்லாமல் இறந்து போகிறாள். வேங்கடம் கம்யூனிச கொள்கையால் ஈர்க்கப்பட்டு ஊதிய உயர்வு கேட்டு போராட்டம் நடத்துகிறார். போராட்டத்தின் ஒரே ஒரு கோரிக்கை மட்டும் ஏற்கப்பட்டு மற்ற அனைத்தும் நிராகரிக்கப் படுகிறது. அதனால் போராட்டம் தொடர்கிறது. தன் மகளுக்கு கல்யாணம் நிச்சயமாகிறது. அதனால் அவளுக்கு பட்டு சேலையை நெய்து முடிக்கும் எண்ணத்தில் தானே போராட்டத்தை வாபஸ் பெறுகிறார். அதில் அவருடைய நண்பருக்கு கோபம். முதலாளியிடம் பணம் பெற்றுக் கொண்டு செயல்படுகிறார் என்று நினைக்கிறார்.

மறுபடியும் வேலைக்கு செல்கிறார் வேங்கடம். மீதி பட்டு சேலை நெய்வதற்காக மீண்டும் வாயில் அடைத்துப் பட்டு நூலைத் திருடுகிறார். வாயில் அடைத்து வைத்து வீட்டுக்குத் திரும்பும்போது தன்னுடைய நண்பரால் மாட்டிக்கொள்கிறார். எல்லோரும் அவரை அடித்து உதைக்கிறார்கள். அவரது மகள் அவரை அடிக்க வேண்டாம் என்று கெஞ்சுகிறாள். போலீஸ் அவரைப் பிடித்துச் செல்கிறது. வேங்கடம் ஜெயிலுக்கு சென்றதும் அவரது மகள் உடல் நிலை மோசமாகிறது. தன் மகளைக் காண பரோலில் வருகிறார். தன் மகளின் உடல்நிலையை பார்த்து கண் கலங்குகிறார். தன் கையாலேயே உணவில் விஷம் கலந்து தன் மகளுக்கு ஊட்டுகிறார். மகள் இறந்தவுடன் தான் நெய்து வைத்த பட்டு சேலையை அவளது உடம்புக்கு போர்த்துகிறார். ஆனால் அவர் நெய்த பட்டு சேலையால் அவரது மகளின் பிணத்தைக் கூட மூட முடியவில்லை. மீண்டும் பிணத்தை முழுமையாக மூட முயற்சி செய்கிறார். முடியவில்லை என்று தெரிந்து விரக்தியில் சிரிக்கிறார். அந்த விரக்தியான சிரிப்போடு படம் நிறைவடைகிறது.

வேங்கடமாக பிரகாஷ்ராஜ் அருமையாக செய்திருக்கிறார். ஒரு நெசவாளியின் துயரத்தை நம் கண்முன் கொண்டு வருகிறார். இதற்கு மேல் யாரும் இந்த பாத்திரத்தை செய்திருக்க முடியாது. மனிதர் வாழ்ந்திருக்கிறார். அவரது மனைவியாக ஷ்ரேயா ரெட்டி நிறைவாக செய்திருக்கிறார். பிரகாஷ்ராஜின் நண்பராக வருபவர், முதலாளி, பிரகாஷ்ராஜின் மகள் என அனைவரும் தங்களுடைய கதாபாத்திரங்களை நிறைவாக செய்திருக்கிறார்கள். டைரக்டர் ப்ரியதர்ஷனை என்ன சொல்லி பாராட்டுவது என்றே தெரியவில்லை. அவருக்கு நம்முடைய வாழ்த்துக்கள். அவர் மேலும் இந்த மாதிரி முயற்சிகளை தொடர வேண்டும்.

பின்குறிப்பு:

நம்முடைய தமிழ் சினிமா நாயகர்கள் அஜித்தும் விஜயும் இந்த மாதிரி முயற்சிகளை எடுக்கலாமே. ஏன் அவர்கள் எல்லாம் ஒரே மசாலா படங்களாக நடிக்கிறார்கள் என்று புரியவில்லை. அவர்களுக்கு இருக்கும் பப்ளிசிட்டிக்கு அவர்கள் இந்த மாதிரி நல்ல கதையம்சமுள்ள, நடிப்பிற்கு தீனி போடும் படங்களையும் அவ்வப்போது செய்யலாமே. அது அவர்களுக்கு மக்கள் மத்தியில் மரியாதையை பெற்றுத் தரும். முயற்சி செய்வார்களா? அஜித்தின் மேல் எனக்கு ஓரளவு நம்பிக்கை இருக்கிறது. விஜயின் மேல் சுத்தமாக இல்லை.

Monday, March 16, 2009

யோசி மகனே யோசி! - கொஞ்சமா.


ஒரு பழக்கடைக்கு ஒருவன் சென்றான். அவன் அந்த பழக்கடை முதலாளியிடம் ஒரு பத்துரூபாய் நோட்டைக் கொடுத்து ஒரு ஆரஞ்சு ஜூஸ் போடச் சொன்னான். உடனே அந்த முதலாளி அவனைப் பார்த்து சாதா ஜூஸ் வேண்டுமா அல்லது ஸ்பெஷல் ஜூஸ் வேண்டுமா என்று கேட்டார். அதற்கு அவன் சாதா ஜூஸ் போதும் என்றான். பழக்கடை முதலாளியும் அவனிடம் அவனிடம் இரண்டு ரூபாய் சில்லறை கொடுத்து விட்டு சாதா ஜூஸ் விலையான எட்டு ரூபாய்க்கு ஆரஞ்சு ஜூஸ் போட்டுக் கொடுத்தார். அவனும் ஜூஸ் குடித்து விட்டு சென்றுவிட்டான்.


அடுத்ததாக இன்னொருவன் அதே பழக்கடைக்கு வந்தான். அவனும் அந்த முதலாளியிடம் காசு கொடுத்து விட்டு ஆரஞ்சு ஜூஸ் ஒன்று என்றான். ஆனால் முதலாளி அவனிடம் சாதா ஜூஸ் வேண்டுமா அல்லது ஸ்பெஷல் ஜூஸ் வேண்டுமா என்று கேட்காமல் அவனுக்கு ஸ்பெஷல் ஆரஞ்சு ஜூஸ் போட்டுக் கொடுத்தார்.


இப்போது கேள்விக்கு வருவோம். முதலில் அந்த கடைக்கு வந்தவனிடம் அந்த கடை முதலாளி உனக்கு சாதா ஜூஸ் வேண்டுமா அல்லது ஸ்பெஷல் ஜூஸ் வேண்டுமா என்று கேட்டார். ஆனால் இரண்டாம் வந்தவனிடம் அப்படி கேட்காமல் அவனுக்கு ஸ்பெஷல் ஜூஸ் போட்டுக் கொடுத்தார். அந்த கடை முதலாளி இருவரிடமும் ஏன் இருவேறு முறையில் நடந்து கொண்டார்?

இத்துடன் இந்த கேள்வி முடிகிறது. பதில் கீழே கொடுக்கப்பட்டுள்ளது. ஆனால் அதைப் பார்க்கும் முன்பு நீங்களாகவே சற்று சிந்தித்து இதற்க்கான விடையை கண்டுபிடிக்கலாம். அப்படியும் முடியாதவர்கள் விடையைப் பார்க்க கீழே செல்லலாம்.

.

.

.

.

.

.

.

.

.

.

.

.

.

.

.

விடை:

முதலில் வந்தவன் அந்த முதலாளியிடம் பத்து ரூபாய் கொடுத்து ஜூஸ் வேண்டும் என்று கேட்டான். அதனால் அந்த முதலாளி அவனுக்கு ஸ்பெஷல் அல்லது சாதா ஜூஸ் வேண்டுமா என்று தெரியாமல் அவனிடம் எந்த ஜூஸ் வேண்டும் என்று கேட்டார். ஆனால் இரண்டாவதாக வந்தவன் முதலாளியிடம் ஒரு ஐந்து ரூபாய் நாணயத்தையும் இரு இரண்டு ரூபாய் நாணயங்களையும் மற்றும் ஒரு ஒரு ரூபாய் நாணயத்தையும் கொடுத்து ஜூஸ் வேண்டும் என்று கேட்டான். அதனால் அவனுக்கு ஸ்பெஷல் ஜூஸ் வேண்டும் என்று அறிந்து கொண்டு அவனைக் கேட்காமலேயே அவனுக்கு ஸ்பெஷல் ஜூஸ் போட்டுக் கொடுத்தார்...

மறுபடியும் வேறொரு கேள்வியில் சந்திப்போம்.